صوفیانہ مشاعرہ

مجید لاہوری نے ایک نظم بعنوان “انجمن تحسین باہمی” لکھی تھی ، قید قرطاس سے زمینی پر آنے میں اس کو وقت تو لگا مگر دیر آید درست آید ۔
بچشم نم اور شاعروں کے باہمی تمدیح و تحسین کے رویے کے آگے سر تسلیم خم کرکے رقم کرتا ہوں کہ گزشتہ ہفتے ایک صوفیانہ مشاعرے – اس میں صوفیانہ کیا تھا یہ آگے آئے گا- میں جانا ہوا ، جانا تو محاورتاً کہ دیا ہے ورنہ وہ لے جانا ہوا تھا ، یعنی کہ میں تین دیگر شاعروں کے ساتھ بوسیلہ کار -وسیلہ صرف صوفیانہ کی نسبت سے لگایا ہے ، احباب معاف فرمائیں- مشاعرہ گاہ تک مع جملہ کھانسی و نزلہ پہونچا تھا ، اس امید پر کہ آج ساڑھے چار غزلوں پر مشتمل دیوان کی ادھوری غزل جو کہ خرافات سے پاک ہے نذر سامعین کر دوں گا ، مگر وائے بر تقدیر من کہ جاتے ہی معلوم ہوا کہ مقامی اور مضافات کے تمام بڑے بڑے -قد آور- شعرا بغیر کسی نذرانے کی امید اور معاوضے کی لالچ کے تشریف لائے ہوئے تھے ، جیسا کہ میں عرض کر چکا ہوں کہ مشاعرہ صوفیانہ تھا تو کھانا حسَبِ معمول -س پر فتحے کے ساتھ ، ایسا ناظم صاحب کے دہن مبارک سے سنا- مشاعرے سے پہلے اور شرفا کے وقت کے بعد کھایا گیا ، ایک شاعر صاحب کھاتے کھاتے گویا ہوئے کہ آلو میں گوشت کی بو آ رہی ہے ، لمحے بھر کے لیے تو مجھے ان کے ایمان پر شک ہوا مگر پھر یاد آیا کہ شک صرف “وہابڑوں” کے ایمان میں کیا جاتا ہے ۔

خرد و نوش سے فراغت کے بعد مجھ نا مکمل شاعر اور آدھے ادھورے مولوی سے کلام پاک کی تلاوت کے لیے درخواست کی گئی کہ اس کے بعد باقاعدہ مشاعرہ شروع ہونا تھا ، تلاوت کرنے کی بابت سن کر سینے میں دھچکا سا لگا کہ لیجیے نئی غزل پڑھنے کے ارمان بالکل اسی طرح بہ گئے جس طرح ۔۔۔۔۔۔۔۔۔۔۔۔ بہ جاتے ہیں ۔ (خالی جگہ خود پُر کر لیں)

خیر ، خوش بختی جان کر اس ذمہ داری سے سبکدوش ہوا اور اپنی جگہ لی ، اس کے بعد تو مشاعرے کے صوفیانہ ہونے کا خیال اس وقت آیا جب جناب صدر نے اعلان کیا کہ سلام پڑھنے کے بعد مشاعرے کا اختتام ہوگا ، میں نے یہ سوچ کر ضبط کر لیا شاید تلاوت اور سلام کے بیچ کی تمام ہلچل وہی حیثیت رکھتی ہے جو مکمل بات میں جملۂ معترضہ رکھتا ہے ۔
یقینا آپ سوچ رہے ہوں گے کہ تلاوت سے شروع ہونے والی اور سلام پر ختم ہونے والی محفل کی روداد کہاں ہے تو عرض کیے دیتا ہوں کہ اگر اس کے بعد مجھے بھرے مشاعرے میں داد نہیں ملتی اور اس کے غم سے میں نڈھال ہوکر ذہنی تناؤ کا شکار ہو جاؤں اور نا دانستہ طور پر راہ چلتی کسی شریف خاتون کو چھیڑ دوں تو اس کی ذمہ داری اس صوفیانہ مشاعرے کے منتظمین پر ہوگی ، میں اس کا سزاوار نہیں ۔
اولا تو جان لیجیے کہ مشاعرہ بالکل اسی طرح کے نشیب و فراز سے بھرا ہوا تھا جس طرح کے نشیب و فراز سے امت گزشتہ سو سال سے گزر رہی ہے ، یقینا آپ چند لمحوں کے لیے ملول ہوں گے مگر چیں بہ جبیں ہرگز نہ ہوں کہ وہ کام صرف امام مہدی کا ہے ۔
مشاعرے کی نظامت دو خانوں میں بٹی ہوئی تھی ، بڑے شعرا -عمر میں- کو بلانے کے لیے ایک ادھیڑ عمر کے ناظم اور چھوٹے شعرا -عمر میں- کو بلانے کے لیے جوانی سے ادھیڑ عمر میں قدم رکھ رہے ایک ناظم کو مقرر کیا گیا تھا ، ابھی انتظامیہ کی انتظامی صلاحیتوں پر داد مت دیجیے بلکہ چشم حیرت زدہ کو مزید حیران ہونے کے لیے تیار رکھیے ۔
پہلے شاعر کو جناب صدر کی خواہش پر ناظم نے آواز دی تو انہوں نے نثری غزل پڑھی -یہ تو میں کہ رہا ہوں ، جب کہ ان کو نہیں معلوم – ، اول اول تو مجھے کسی حدیث یا کسی سلف کے عربی قول کا ترجمہ معلوم دیا مگر پھر یقین ہو چلا کہ یہ آنجناب کے ہی حصے کی ساحری ہے ، بعد ازیں نعتیہ اشعار کے بعد مشاعرے نے وہ رنگ اختیار کیا جس کے لیے وہ منعقد ہوا تھا یعنی صوفیانہ رنگ ، خدا کو حاضر و ناظر جان کر کہتا ہوں کہ دو ایک کو چھوڑ کر اگر کسی نے بھی صوفیانہ رنگ کی شاعری کی ہو تو آپ لکھنؤ کے سب سے بھرے پُرے علاقے میں بغیر انا الحق کا نعرہ لگائے مجھے تختہ دار پر لٹکا دیجیے گا ۔
بیچ بیچ میں تو مجھے یہ گمان ہو رہا تھا کہ یہ مشاعرہ خالص ناظم صاحب کی صلاحیتوں کو اجاگر کرنے کے لیے منعقد کروایا گیا ہے ، نا شناس شعرا کو چھوڑ کر ہر شاعر کو انہوں نے اس طرح نوازا کہ ان کی داد کو اگر منظوم کلام میں جمع کیا جائے تو میر خدائے سخن کا منصب چھوڑ نیچے بیٹھ جائیں اور ناظم صاحب کو اوپر بٹھا دیں ، مرے پر سو درے مزید کہ ناظم صاحب جب مائک پر مترنم ہوئے تو ایک مرتبہ تو انہوں نے اپنا لوہا منوانے کے لیے اپنے کلام کی بحر ہی ترنم سے پڑھ دی ، پھر اس کے بعد چراغوں کی لویں بجھنے کے قریب تھیں کہ رات کے تین بجے مجھ اچھے استاذ کے خراب شاگرد کو آواز دے دی گئی ، وگرنہ یقین جانیے میں خرابئ صحت کے باعث تین ساتھی شعرا کے کاندھوں پر آ رہا ہوتا ، چوتھا شاید میرا ہمزاد ہی ہوتا ۔
طول مشاعرہ کا عالم یہ تھا کہ اس صبح بستی میں مرغے نے بانگ نہیں دی کہ سب تو شعرا کی شعر سامانیوں کی وجہ سے جاگ ہی رہے ہوں گے ۔
اخیر میں مجید لاہوری کی نظم ملاحظہ فرما لیں اور غیر مکتوب روداد کا نقشہ آپ کھینچ لیں کہ مجھ میں مزید بیان کرنے کی تاب نہیں ۔

” عَرض کرتا ہُوں جناب ”
” واہ واہ ”
” پِھر عَطا فرمائیے ”
” عرض کی تعریف ہو سکتی نہیں”
” واہ واہ ۔۔۔۔۔۔۔۔۔۔۔۔ واہ واہ ”
” عرض کرتا ہُوں جناب ”
” کوئی لا سکتا نہیں اس کا جواب ”
” عرض کرتا ہُوں حضور”
” واہ واہ ۔۔۔۔۔۔۔۔۔۔۔۔ واہ واہ “

” خُوب بلکہ خُوب تر ”
” پھر عطا فرمائیے ”
” پِھر ذَرا دُہرائیے ”
” پَڑھتے رہئیے بار بار ”
” واہ واہ ۔۔۔۔۔۔۔۔۔۔۔۔۔۔۔ واہ واہ ”
” عرض کی تعریف ہو سکتی نہیں”
” بالیقیں”
” واہ واہ ۔۔۔۔۔۔۔۔۔۔۔۔۔۔۔ واہ واہ “

” عرض کرتا ہُوں کہ چشم”
” واہ چشم ”
” واہ چشم ۔۔۔۔۔۔۔۔۔۔ واہ واہ ”
” چشم کا چشمہ غضب ہے ۔۔۔۔۔۔۔۔۔۔ واہ واہ ”
” خُوب خُوب “

” چشمِ نرگس ”
” واہ نرگس واہ واہ ”
” چشمِ نرگس ہائے ہائے ”
” پِھر عطا فرمائیے ”
” بار بار ”
” واہ واہ ۔۔۔۔۔۔۔۔۔۔۔۔۔۔ واہ واہ “

” چشمِ نرگس اِن دنوں”
” ان دنوں”
” تعریف ہو سکتی نہیں”
“واقعی تعریف ہو سکتی نہیں”
” اِن دنوں ۔۔۔۔۔۔۔۔۔۔ کیا حال کی تصویر ہے ”
” ان دنوں امروز کی تفسیر ہے ”
” کوئی کہہ سکتا نہیں”
” آپ نے جو کہہ دیا ”
” یہ تو ٹیڑھی کھیر ہے ”
” واہ واہ ۔۔۔۔۔۔۔۔۔۔۔۔۔۔۔۔ واہ واہ ”
” اِن دنوں بیمار ہے”
” چشمِ نرگس اِن دنوں بیمار ہے”
” زِندگی اِک مُستقل آزار ہے ”
” واہ واہ ۔۔۔۔۔۔۔۔۔۔۔۔۔۔۔۔ واہ واہ “

” چشمِ نرگس اِن دنوں بیمار ہے تیرے بَغیر”
” تیرے بَغیر واہ واہ ”
” چشمِ نرگس- اِن دنوں- بیمار ہے- تیرے بغیر ”
” واہ واہ ۔۔۔۔۔۔۔۔۔۔۔۔۔۔۔۔ واہ واہ ”
“تعریف ہو سکتی نہیں ۔۔۔۔۔۔۔۔۔۔ اُف غَضب ”
” اِن دنوں بیمار ہے ۔۔۔۔۔۔۔۔۔۔۔ کیا خُوب ہے ”
” کیا حسیں اسلوب ہے”
” اور۔۔۔۔۔۔۔۔۔۔۔۔۔۔۔۔۔۔۔ یہ تیرے بغیر ”
” واہ واہ ”
” چشمِ نرگس اور پِھر بیمار ہے۔۔۔۔۔۔ ہائے غَضب ”
” بَس یہی ٹُکڑا تو ہے رُوحِ اَدب ۔۔۔۔۔۔۔۔۔ جانِ اَدب ”
” واہ واہ ۔۔۔۔۔۔۔۔۔۔۔۔۔۔۔۔۔ پڑھتے رہئے بار بار ”
” چشمِ نرگس اِن دنوں بیمار ہے تیرے بَغیر ”
” واہ واہ ۔۔۔۔۔۔۔۔۔۔۔ واہ واہ ”
” خُوب خُوب ”
” خُوب بلکہ خُوب تر ”
” پِھر عطا فرمائیے ”
” ہاں یہی دُہرائیے ”
” چشمِ نرگس اِن دنوں بیمار ہے تیرے بَغیر ”
” واہ واہ ۔۔۔۔۔۔۔۔۔۔۔۔۔۔۔۔۔۔۔۔ واہ واہ ”
” بس یہی مِصرع اَدب کی جان ہے ”
” ایک مِصرع کیا عظیم الشان ہے”
” حافظ و خیام کا دیوان ہے ”
” یا عظیم الڈان ہے ”
” واہ واہ ۔۔۔۔۔۔۔۔۔۔ واہ واہ ”
” خُوب ”
” خُوب “

LEAVE A REPLY

Please enter your comment!
Please enter your name here