شبِ فراق میں بھی وصل سا سرور رہا
رہا نہ پاس مرے وہ نہ مجھ سے دور رہا
کریں گے عشق، اڑائیں گے خاک صحرا میں
کہ کم سنی سے ہمیں اک یہی فطور رہا
ترس گئے ہیں جسے دیکھنے کو ماہ و مہر
وہ شوخ پیکرِ ضو، بس مرے حضور رہا
کلیم حسرتیں کرتے ہی رہ گئے آخر
مگر نصیب تو دیکھو کہ نذرِ طور رہا
سرائے دل میں نہیں اک پلک بھی تنہائی
کوئی نہ کوئی یہاں دم بہ دم ضرور رہا
عجیب حال ہے صائنؔ کہیں تو کس سے کہیں
کہ پستیوں پہ ہمیں کس قدر غرور رہا