جو ہو نہ پائی اُسی بات کی کہانی ہے

جو ہو نہ پائی اُسی بات کی کہانی ہے
یہ میری اُسکی ملاقات کی کہانی ہے

مرے بدن کو جو دیمک لگی تو کیسے لگی
سب انتظار کے لمحات کی کہانی ہے

گھروں کی بات الگ ہے وہاں پہ خوشبو ہے
یہ روکھے سوکھے مکانات کی کہانی ہے

ہزار راتوں پہ یہ پھیلتی گئی آخر
تمہیں لگا تھا بس اک رات کی کہانی ہے

کہیں پہ جشن بپا ہے کسی کی آمد کا
کسی کے آخری لمحات کی کہانی ہے

عجیب بات ہے میں خود بھی پڑھ نہیں سکتا
نہ جانے کیسی مری ذات کی کہانی ہے